Atentati ndaj Cekës për borxhet

Edhe pse nuk ka asnjë të ndaluar, policia dhe Prokuroria janë të bindura se atentati i të mërkurës në Tiranë, ndaj biznesmenit Armando Ceka dhe dy të punësuarve të tij, lidhet me borxhet që ai u kishte marrë të tjerëve.

Pas dhjetëra të shoqëruarve, hetuesit përveçse po i pyesin, po grumbullojnë po ashtu informacion me marrëdhëniet që ai kishte me sipërmarrës të tjerë, veçanërisht atyre që u kishte marrë borxhe, shuma e të cilave në një rast, sipas burimeve jozyrtare shkonte deri në 800 mijë euro.

Por prokurorët po dokumentojnë edhe konfliktet më qytetarë të thjeshtë, të cilët kanë denoncuar në polici më herët për shitje të dyfishta të apartamenteve, ku në Prokurorinë e Tiranës, për këto raste janë të regjistruara tre procedime penale ndaj Armando Cekës për veprën penale të mashtrimit.

Policia thotë se qytetarët kanë patur konflikte me biznesmenin, edhe për mospërfundim të investimeve, për të cilat ai u kishte marrë para disa shtetasve. Por, nuk përjashtohet edhe mosmarrëveshjet e tjera, që pritet të jenë të dokumentuara të bazë të dëshmive të marra nga të afërm të Cekës.

Prokuroria vijon të besojë se objektivi i atentatit ka qenë 33-vjeçari Ceka dhe jo dy të punësuarit e tij, Artur Sharra, që e shoqëronte si truproje dhe Julian Çela që kishte pak kohë që ishte punësuar si shofer. Ky i fundit, një i ri i diplomuar si jurist, por që për shkak se nuk po gjente punë kishte pranuar të ishte shoferi i biznesmenit Ceka.

Një ditë pas atentatit, objekti dykatësh vijon të konsiderohet vendngjarje për hetuesit, të cilët vazhdojnë ta mbajnë të rrethuar me shirita të gjithë perimetrin e godinës. Banorët e rrugës "Budi" tregojnë se Armando prej kohësh kërkohej nga qytetarë të shumtë, me të cilët ai kishte probleme. Madje, ata kujdeseshin që ai të mos e parkonte makinën përpara pallateve apo lokaleve të tyre, pasi i trembeshin ndonjë atentati, sikurse edhe ndodhi.